Endereço do edifício:
Mascarinhas, Dili, Timor-Leste
Endereço do edifício:
Karu Dirijente organizasaun membru no parseiru hotu.
“Asosiasaun Defisiénsia Timor-Leste (ADTL) mak organizasaun salurik ba organizasaun hotu ne’ebé serbisu no tau-matan ba asuntu ema ho defisiénsia, ho nia misaun atu halo advokasia ba mudansa politíka, atitude no ambientál. Esforsu sira-ne’e hotu ita halo hodi asegura iha ekuidade partisipasaun ema ho defisiénsia iha dezenvovimentu nasionál”.
Hanesan organizasaun sumbriña, ita observa katak maske ho limitasaun oioin, membru barak mak halo servisu atendimentu direta ba ema ho defisiénsia. Nune’e, ADTL liuhusi konsultasaun ho membru sira deside hamosu livru ida ne’e. Livru ne’e mak Diretória referál servisu organizasaun hotu ne’ebé hala’o servisu iha aréa promosaun no protesaun diretu ema ho defisiénsia.
Ha’u fiar katak ho diretória referál ida-ne’e sei tulun organizasaun membru sira hodi halo koordenasaun ba-malu no mós halo koordenasaun ho parseiru sira seluk, nasionál no internasionál ne’ebé iha programa espesífiku ba ema ho defisiénsia, ho intensaun atu fasilita parseiru nasionál ho internasionál sira, inklui instituisaun governu relevante sira atu bele halo koordenasaun direta ho organizasaun membru sira hodi fasilita serbisu atendimentu ba ema ho defisiénsia no referal sira hodi hetan atendimentu liután tuir nesesidade ema ho defisiénsia nian
Tinan ida-ne’e ADTL kontinua prioritiza serbisu atendimentu ba organizasaun membru sira liuhusi apoiu fundus ki’ik. Diretória ida-ne’e bele uza hanesan referénsia hodi hatene sei halo saida bainhira hanoin kona-ba refere ema ho defisiénsia ne’ebé presiza tulun lalais.
Ita-nia rain doben Timor-Leste hatudu daudaun ona avansu iha polítika no lejislasaun sira hodi promove no defende ema ho defisiénsia sira-nia direitu umanu. Estadu ratifika ona Konvensaun ONU kona- ba Direitu Ema ho Defisiénsia no ministériu sira kaer ona Planu Asaun Nasionál Ema ho Defisiénsia 2021-2030 hanesan madatalan hodi kria Planu Asaun Anuál ne’ebé reflete ema ho defisiénsia sira-nia interese. Parseiru dezenvolvimentu sira komesa ona halo sira-nia programa sira sai inkluzivu ona. Ida-ne’e importante hodi asegura ekuidade partisipasaun ema ho defisiénsia iha ajenda dezenvolvimentu nasionál.
Liuhusi ita hotu nia esforsu, iha ona progresu iha mudansa polítika no programa sira maibé stigma no diskriminasaun, tratamentu dezumanu inklui difikuldade asesu ba oportunidade iha setór oioin, kontinua akontese. Tamba ne’e, presiza ita hotu atu hametin unidade, solidariedade no kolaborasaun serbisu ho parseiru dezenvolvimentu sira hodi kontribui ba hakotu korente violénsia hasoru ema ho defisiénsia, halakon diskriminasaun, hapara tiráni izolamentu no kore an husi kiak no mukit.
Ba ita no ba sira seluk, labele husik ema ruma iha kotuk. Hamutuk ita forte. Hau, reprezenta estrutura ADTL iha biban murak ida-ne’e hakarak hato’o apresiasaun no obrigadu wain ba:
1. Governu liuhusi instituisaun públiku relevante sira ne’ebé introdúz ona polítika no programa oioin ne’ebé inkluzivu ba ema ho defisiénsia.
2. Parseiru dezenvolvimentu nasionál
no internasionál hotu ne’ebé kontinua prioritiza no integra asuntu ema ho defisénsia iha sira-nia planu no programa sira.
3. Organizasaun membru hotu ne’ebé dedika an serbisu ho voluntáriu iha baze, liuliu hodi fo ona dadus no informasaun hodi dezenvolve diretória ida-ne’e.
4. Governu Austrália liuhusi nia Programa Partnership for Human Development ne’ebé fo ona asisténsia tékniku no finanseiru mai ADTL hodi prodúz diretória ida-ne’e.
5. Ekipa ADTL ne’ebé kontribui hanoin hodi dezenvolve no hodi finaliza diretória ida- ne’e.
Obrigadu wa’in.
Dili, 20 Janeiru 2025
Creçensia Madeira de Deus
Presidente Konsellu